70 යුගයේ ඔහු ගුවන් විදුලියේ සරල ගී තනු නිර්මාණකරණයට පිවිසියේය. රෝහණ සිරිවර්ධන ගායනා කරන "ඔබේ අත ගෙන පෙර සැදෑවක" ගීතය ඔහු තනු නිර්මාණය කළ මුල් ගීතයයි. එම ගීතය ගුවන්විදුලි ගී අතර ඉතා ජනප්‍රිය ගීතයක් විය. නිරංජලා සරෝජනී, නිර්මලා රණතුංග මල්කාන්ති නන්දසිරි ඇතුළු ගුවන් විදුලි ගායක ගායිකාවන් රැසකට තනු නිර්මාණය කළ ඔහු 70 යුගයේම ඔහුගේ මුල් ගීතය එළි දැක්විය. "රන්තරු මිනිමුතු අභරණ ඇඳන්" ගීතය ඔහුගේ කුළුදුල් ගීතය වේ. 1973 ඔහු ගැයූ මුතු කුඩා ඉගිලෙන ගීතය රසිකයන්ට සමීප වූ ගීත අතරින් විශේෂ වූ ගීතයක් විය. 1977 නැටුම් ආචාරිණියක වූ බ්යට්‍රිස් ලීලා මෙනවිය සමඟ විවාහ වූ හෙතම කලිදු සහ චිරාත් පුතුන්ට දයාබර පියෙකු විය. 1979 සිං ලංකා ශබ්දාගාරයේ ශබ්ද පරිපාලක සහයක ලෙස ඔහු නව පියවරක් තබන්නේ සංගීත දැනුම සපිරුණු මනසක් සහ සවනක් මෙහෙයවමිනි. මෙම යුගයේදී ඔහු විසින් ටි.එම ජයරත්න සහ නීලා වික්‍රමසිංහට නිර්මාණය කළ "එක සිත දෙතැනක නතර වෙලා"  "හිරුට හොරෙන්", " පුංචි සිතේ පුංචි සිනා" වැනි ගීත රසිකයන්ගේ සිත් සොරාගත්තේ හීයක වේගයෙනි. 

ඒ රෝහණ වීරසිංහගේ තනු නිර්මාණයේ කුසුම විකසිත වූ අවදියයි. වාදනය, ගායනය මෙන්ම ඔහු තනු නිර්මාණයටද මුල් තැනක් දුන්නේය. බටහිර ගීත දමිළ ගීත හින්දි ගීත ඇතුළු විවිධ දේශයන්හි විවිධශෛලියේ ගීත රස විදිමින් එම ගීතවල රසය වටහාගත් අතර එම ගීත ස්වඅධ්‍යනය කළේය.ඔහු විසින්  නිර්මාණය කරන ගී තනු තුළ ඇත්තේද හදවත් වැළද ගැනීමේ ප්‍රාණයයි. නන්දාමාලනි, වික්ටර් රත්නායක,  සුනිල් එදිරිසිංහ, එඩ්වඩ් ජයකොඩි, දීපිකා ප්‍රියදර්ශනී, වික්ටර් රත්නායක ඇතුළු හරවත් පදමලාවන් සොයා ගී ගයන ගායක ගායිකාවෝ හරවත් නිර්මාණයක් එළි දැක්වීමට ඔහු සොයා ආවේ ඔහුගේ නිර්මාණ වල රසය හදුනාගත් බැවිනි. ඒ ඒ කටහඩේ ගායන පරාසය සහ ගායන හැඩතල හඳුනාගෙන තනු නිර්මාණය කිරීමට සහ ඒ ගීත සංගීත අධ්‍යක්ෂණය කරන විට යොදා ගන්න සංගීත භාණ්ඩ ඇතුළු අත්වැල් ගායනා සහ (harmony)සංගත ගායනා ගැන ඔහු තුළ ඇත්තේ සංගීත අධ්‍යාපනය අභිබවා ගිය සංගීතමය පරිණත බවකි. නන්දා මාලනිය ගයන "සුළං කපොල්ලේ" ගීතයෙන් මතු කරන භාව්‍යයමය බවත් නීලා වික්‍රමසිංහ සහ ටි.එම ජයරත්න ගයන "පොල් කිචි නයිදේ" ගීතයත් දීපිකා ප්‍රියදර්ශනී ගයන 'කවිය ඔබ,ප්‍රදීපා ධර්මදාස ගයන "නෙක උයන් "යන ගීත මේ බව මානව පිළිබිඹු කරයි. දේශීය ශෛලිය හා බටහිර ශෛලිය වෙන් වෙන්ව  මිශ්‍ර වූ විවිධ තනු ඒ ඒ ගායකයාගේ කට හඬට මුසු කිරීමේ හැකියාව ඔහු ප්‍රගුණ කළ සංගීතමය  ඥානයේ උත්තරීතර ප්‍රතිපලයකි.

 

තනිවෙන්නට මගේ ලොවේ  (වික්ටර්) අහස සේ  (නන්දාමාලනි) වියෝ වූ පසුවයි ( සුනිල් එදිරිසිංහ) ආරාධනා (අමරදේව) නෙක උයන් (ප්‍රදීපා) සුවඳ දැනී (රූකාන්ත ) යන ගීත මෙන්ම දයාන් විතාරණ, උරේෂා රවිහාරි, නිරෝෂා විරාජිනී, ඇතුළු මෙකි නොකී ගායක ගායිකාවන්ට සඳු -තරු ලෙස බබලන්ට එළිය දුන් දිනිදු ඔහු විය. එක් එක් සංගීත රටාවන්, සංගීත ශෛලීන්වල මෘදු තැන් ඔහු ගීත නිර්මාණයන්ට ස්පර්ශ කළේ නිවැරදි ස්වරයට නිවැරදි තත් හඬවමිනි.  සුවඳ දැනී, රත්තරන් දුවේ, යන ගීත තුළින් ගලා ආ බටහිර ශෛලිය අප ගී ශෛලිය හා මුසු වුණේ එලෙසිනි. තම පුතුන් දෙදෙනා වන කලිඳු සහ චිරාත් සමඟ ඔහු ඉදිරිපත් කළ "පිය පුතු ගී මුතු" සංයුක්ත තැටිය ඔහුගේ අනන්‍යතාව විහිදුවන නිර්මාණ එකතුවක් වන අතර ඔහුගෙන් නිර්මාණය වූ ගීත 5000කට අධික ප්‍රමාණයක්‌ ඇත. සංක්‍රාන්ති සමය, දුන්හිඳ අද්දර, තලමල පිපිලා, මාගාත ගජමන් නෝනා ඇතුළු ටෙලි නාට්‍ය 250 ට අධික ප්‍රමාණයක සංගීත අධ්‍යක්ෂක කළ රෝහණ වීරසිංහයන් 1972 දුන්හිඳ අද්දර  සඳහා සිග්නිස් සම්මානයද

1994 සුමති සම්මානය - (සංක්‍රාන්ති සමය)

1998 සුමති සම්මානය- (වීලමබිත)

2002 සිග්නිස් සම්මානය-( ගජමන්නෝනා)

2008 රයිගම් සම්මානය - (රළ බිඳෙන තැන)

1990 රාසා සම්මානය -( තලමල පිපිලා )

1991 රාසා සම්මානය (හොඳම ගීතය )- සඳ පහනක් සේ

1997 රාසා සම්මානය (ජනප්‍රිය ගීතය )- රන්මලක් ලෙස

 

ඇතුළු ටෙලි නාට්‍ය ගණනාවකට සම්මාන හිමි කරගත් ඔහුගේ සංගීත නිර්මාණයෙන් ප්‍රබුද්ධ වූ චිත්‍රපටි අප මතකයෙන් බැහැර කළ නොහැකිය 1982 සිට 2014 දක්වා සංගීත අධ්‍යක්ෂණය කළ චිත්‍රපටි 200කට අධිකය.